Namangan davlat pedagogika instituti Filologiya kafedrasining professor- o'qituvchilari tomonidan 4-bosqich talabalari ishtirokida 8-mart — Xalqaro xotin-qizlar bayrami munosabati bilan “MUQADDAS AYOL” nomli ma’naviy-ma’rifiy tadbir yuqori saviyada tashkil etildi.

Bayramona bezatilgan zalda onalar, qaynonalar va ustoz professor ayollarni tantanali kutib olish marosimi tadbirga o‘zgacha ruh bag‘ishladi. Talabalar tomonidan ayol zotining jamiyat va oiladagi beqiyos o‘rni, mehr-muhabbati va fidoyiligi haqida samimiy fikrlar bildirildi. Tadbir davomida dilbar she’rlar o‘qildi, jarangdor qo‘shiqlar yangradi, milliy kuy-qo‘shiqlar ijro etilib, mehmonlarga ko‘tarinki kayfiyat ulashildi. Ayniqsa, ona va qaynonalarga bag‘ishlangan ta’sirchan sahna ko‘rinishlari yig‘ilganlarda chuqur taassurot qoldirdi. Talabalarning qalbdan chiqqan tilak va ehtirom so‘zlari zalni iliq tuyg‘ularga to‘ldirdi.

Tadbir yakunida qaynonalar hamda onalar institutning tashakkurnomasi va esdalik sovg‘alari bilan taqdirlandilar. Bu e’tibor va ehtiromdan mamnun bo‘lgan mehmonlar o‘z minnatdorliklarini bildirib, bunday tadbirlar yoshlar qalbida mehr-oqibat va qadriyatlarni mustahkamlashini alohida ta’kidladilar.

❮ ❯