Hindistonning O‘zbekistondagi elchisi Smita Pant xonim boshchiligidagi delegatsiya 2026-yil 25-mart kuni Namangan davlat pedagogika institutiga tashrif buyurdilar hamda institut rektori B. Xusanov boshchiligida ko„tarinki kayfiyatda kutib olindi.

Namangan davlat pedagogika institutida 2026-yil 25-mart kuni “Navroʻzni ulugʻlash – insonni ulugʻlashdir!” shiori ostida Navroʻz sayli ko‘tarinki ruhda tashkil etildi. Mazkur tadbirda Hindistonning O‘zbekistondagi elchisi Ms. Smita Pant boshchiligidagi delegatsiya a’zolari ham ishtirok etdilar.

Navro‘z sayli davomida delegatsiya a’zolariga o‘zbek qadriyatlari, urf-odatlari, tarixi, madaniyati, san’ati hamda milliy taomlari haqida batafsil ma’lumotlar berildi.

Bundan tashqari, institut tomonidan Hind madaniyatiga oid sahna ko‘rinishlari, jumladan milliy raqslar, qo‘shiqlar hamda badiiy chiqishlar elchixona vakillariga taqdim etildi. Ushbu sahna ko‘rinishlari Smita Pant xonimga manzur bo‘lib, ular tomonidan alohida e’tirof etildi.

Shuningdek, Namangan davlat pedagogika instituti hamda Hindistonning O‘zbekistondagi elchisi o‘rtasida rasmiy uchrashuv bo‘lib o‘tdi. Hindiston Respublikasining O‘zbekistondagi elchisi Smita Pant xonim bilan institutning Renessans zalida hamkorlik dasturi yuzasidan muzokaralar olib borildi.

Dastlab, institut rektori B. Xusanov tomonidan quyidagi takliflar bildirildi:

Hindiston madaniyati va IT sohasidagi ilg‘or texnologiyalarni o„rganish maqsadida Hindiston elchixonasi bilan hamkorlikda institutda “IT ROOM” va “STUDY ROOM” markazlarini ochish;

Mazkur markazlarga Hindistonning nufuzli universitetlari professor-o‘qituvchilari hamda yetakchi mutaxassislarini taklif qilish;

Talaba-yoshlar uchun Hindiston tajribasi asosida IT va ta’lim imkoniyatlarini yaratish;

Hindistonning sun’iy intellekt va ta’lim kompaniyalari investitsiyalarini jalb qilish.

Smita Pant xonim tomonidan esa institutni qo‘llab-quvvatlash va hamkorlikni rivojlantirish maqsadida quyidagi takliflar bildirildi:

Zamonaviy kompyuterlar, serverlar hamda sun’iy intellekt (AI) bo‘yicha laboratoriyalar tashkil etish;

Virtual tajriba stendlari va robototexnika ustaxonasini ochish;

Hindiston AT kompaniyalari tomonidan onlayn va oflayn kurslar tashkil etish; kodlash, sun’iy intellekt, veb-dasturlash va kiberxavfsizlik bo‘yicha treninglar o‘tkazish;

Stajirovka va mentorship dasturlarini yo‘lga qo‘yish;

Yosh startaplar va innovatsion loyihalarni birgalikda rivojlantirish;

Hindiston va O‘zbekiston universitetlari o‘rtasida elektron kutubxonalar hamda ilmiy jurnallar almashinuvini yo‘lga qo‘yish;

Onlayn kurslar, video darslar va virtual konferensiyalar tashkil etish;

Yosh tadqiqotchilar uchun grant va stipendiyalar ajratish;

Jamia Millia Islamia universiteti bilan tuzilgan memorandum asosida qo‘shma ta’lim dasturlarini rivojlantirish.

Uchrashuv yakunida Smita Pant xonimga institut rektori B. Xusanov tomonidan esdalik sovg‘alari topshirildi. Shuningdek, elchi tomonidan ham institut rektori va faol talabalarga esdalik sovg‘alari taqdim etildi.

❮ ❯