2025 yil 16–17 sentabr kunlari Prezidentimiz Shavkat Mirziyoyevning Namangan viloyatiga tashrifi viloyat hayotida katta tarixiy voqea bo‘ldi. Bu tashrifda aholi farovonligini oshirish, hudud imkoniyatlaridan samarali foydalanish, yangi sanoat loyihalarini yo‘lga qo‘yish bilan birga, ta’lim sohasini tubdan yangilash masalasi ham asosiy o‘rinni egalladi.
Prezidentimiz ta’kidlaganidek, “har bir islohotning poydevori ta’limdan boshlanadi”. Shuning uchun Namanganda zamonaviy maktab va bog‘chalar qurish, mavjudlarini modernizatsiya qilish, ayniqsa chekka hududlarda ta’lim imkoniyatlarini kengaytirish ustuvorvazifa sifatida belgilandi.
Tashrif davomida bir necha ustuvor yo’nalishlarga e’tibor qaratildi:
O‘qituvchi – islohotlar markazida. Ta’lim sifatining poydevori o‘qituvchi mahorati ekanligi yana bir bor ta’kidlandi. Shu bois pedagoglar uchun malaka oshirish markazlarini tashkil etish, STEM fanlari va xorijiy tillarni o‘qitish metodikasini yangilash vazifasi qo‘yildi. Bu orqali Namangan o‘qituvchilari xalqaro standartlarga moslashgan, raqamli texnologiyalarni puxta egallagan malakali mutaxassislarga aylanadi.
Raqamli ta’lim – yangi avlod imkoniyati. Bugun dunyo raqamli bilimlar davriga qadam qo‘ydi. Namanganda ham “Elektron maktab”, “ZiyoNET” kabi platformalar imkoniyatlarini kengaytirish, dasturlash va IT yo‘nalishlarini o‘quv jarayonigatatbiq etish rejalashtirilmoqda. Bu yoshlarni mustaqil izlanishga, tanqidiy fikrlashga va ijodiy g‘oyalarni amaliyotga tadbiq qilishga undaydi.
Oliy ta’lim va xalqaro hamkorlik. Tashrif davomida oliy ta’lim masalalari ham muhokama qilindi. Yangi universitetlar tashkil qilish, mavjudlarini xalqaro standartlarga moslashtirish, ilm-fan va ishlab chiqarish integratsiyasini kuchaytirish zarurligi ta’kidlandi. Xususan, xorijiy universitetlar bilan qo‘shma dasturlar, ikki diplomli ta’lim, talabalar hamda professor-o‘qituvchilar almashinuvi yo‘lga qo‘yilishi belgilandi. Natijada Namangan yoshlari chet elga bormasdan ham xalqaro darajadagi bilim olish imkoniyatiga ega bo‘ladilar.
 
Ushbu strategik qadamlardan kutilayotgan natijalar:
✓ Sifatli ta’lim muhiti – zamonaviy maktab va laboratoriyalar orqali o‘quvchilarning bilim olish sharoitlari yaxshilanadi;
✓ Pedagog nufuzi – malaka oshirish orqalio‘qituvchilar jamiyatda yanada hurmat qozonadi;
✓ Innovatsiya muhiti – raqamli ta’lim va STEM loyihalari yoshlarning ijodiy va tadbirkorlik salohiyatini rivojlantiradi;
✓ Yangi avlod kadrlari – xorijiy tillarni bilgan, IT vasun’iy intellektdan xabardor yoshlar yetishib chiqadi;
✓ Xalqaro integratsiya – qo‘shma dasturlar orqali Namangan OTMlari xalqaro reytinglarda o‘z o‘rnini topadi.
Prezidentimizning Namangan viloyatiga tashrifi – bu bir kunlik voqea emas, balki uzoq muddatli rivojlanish dasturidir. Ta’lim sohasiga qaratilgan e’tibor – bu kelajak avlodga, butun Vatan taqdiriga qaratilgan e’tibordir.
Shubha yo‘qki, amalga oshiriladigan vazifalar Namanganni mamlakatning bilim va ma’rifat markazlaridan biriga aylantiradi. Chunki ertangi kun taqdiri – bugungi maktab partasida, o‘qituvchi fidoiyligida va yoshlar tafakkurida mujassamdir.

Xilola Najmiddinova

Intellektual fanlar va axborot texnologiyalari kafedrasi professori