Talabalarning badiiy adabiyotga bo‘lgan qiziqishini oshirish, kitobxonlik madaniyatini rivojlantirish, intellektual tafakkurini shakllantirish hamda dunyoqarashini kengaytirish maqsadida Boshlang'ich ta'lim yo'nalishi 2-bosqich talabalari o‘rtasida “Kitobxonlik” tanlovi tashkil etilib, o‘tkazildi. Mazkur tadbir tashabbuskorlari sifatida o‘qituvchilar: Djakbarova M.I., Lutfetdinova R.X. va Ochilova F.K. ishtirok etdilar.

Tanlov uch bosqichdan iborat bo‘lib, unda ishtirokchilar badiiy asarlar bo‘yicha bilimlari, diqqat-e’tibori, eruditsiyasi hamda jamoada ishlash ko‘nikmalarini namoyish etdilar.

1-bosqich – “Asarni toping”.
Mazkur bosqichda jamoalarga mashhur badiiy asarlardan olingan iqtiboslar taqdim etildi. Ishtirokchilar iqtibos qaysi asardan olinganligini aniqlashlari, shuningdek, qahramonlar va asar mazmuniga qisqacha tavsif berishlari lozim edi. Ushbu bosqich talabalarning tahliliy fikrlashi va kitobxonlik xotirasini rivojlantirishga xizmat qildi.

2-bosqich – “Intellektual tur”.
Ikkinchi bosqichda ishtirokchilar turli badiiy asarlar yuzasidan tuzilgan intellektual savollarga javob berdilar. Talabalar yuqori darajadagi tayyorgarlik, keng dunyoqarash va adabiyot bo‘yicha chuqur bilimlarini namoyon etdilar.

3-bosqich – “Iqtiboslar bilimdoni”.
Yakuniy bosqichda jamoalar asarlardagi mashhur iqtiboslarni bilish bo‘yicha bellashdilar. Eng ko‘p mashhur iqtiboslarni eslab ayta olgan jamoa g‘olib deb topildi. Ushbu bosqich ishtirokchilarda alohida qiziqish va faollik uyg‘otdi.

Tanlov davomida talabalar yuqori darajadagi qiziqish, ijodiy yondashuv va jamoaviy hamjihatlikni namoyon etdilar. Tadbir do‘stona va ma’rifiy ruhda o‘tib, yoshlarning kitob mutolaasi hamda adabiy merosga bo‘lgan qiziqishini yanada mustahkamlashga xizmat qildi.

Tanlov yakunlariga ko‘ra, eng faol ishtirokchilar va jamoalar tashakkurnomalar hamda esdalik sovg‘alari bilan taqdirlandilar. Bunday tadbirlarni tashkil etish talabalarning ma’naviy-axloqiy tarbiyasida va intellektual salohiyatini rivojlantirishda muhim ahamiyat kasb etadi.

❮ ❯